1Jo 2 | TUCO | STEP | O ndinatug, you nambood saveeŋ tonene payam, leso agham sosor sob ve ayoon ariaŋa. Eemoghon ighaze tamtoghon eta itap ve igham sosor, iit leed ŋgeu deŋia eez to ivolvool toit, ve igham avood ve isasavia saveeŋ toit ila to Tamaan Maaron, nene Yesu Krisi.

aRo 8:34; 1Tim 2:5; Hib 7:25

bYo 1:29; Ro 3:25; Kol 1:20; Hib 2:17

cYo 14:15,21, 15:12

dYo 14:23; 1Yo 3:24

eMt 11:29; Yo 13:15; 1Pe 2:21

fWkp 19:18; Yo 13:34+; 1Yo 3:11

gYo 8:12; Ro 13:12; Ep 5:8

h1Yo 4:20

iRo 14:13

j2Pe 1:9; 1Yo 1:6

lMbaŋ 10:43; 1Kor 6:11

nEp 6:10; Syg 12:11

oMt 6:24; Ro 12:2; Yems 4:4

p1Kor 7:31

rMk 13:6; 2Tes 2:3; 1Yo 4:3

sMbaŋ 20:30

t1Yo 4:3; 2Yo 7

u1Yo 4:15, 5:1; 2Yo 9

vYo 14:23; 1Yo 1:3

wYo 6:40, 17:3; 1Yo 5:11

xYo 14:26, 16:13+; Hib 8:10+

yEp 3:12; 1Yo 4:17

zTit 3:5; 1Yo 3:7, 4:7; 3Yo 11

1 John 2

Yesu Krisi, ye Volaaŋa toit

1 O ndinatug, you nambood saveeŋ tonene payam, leso agham sosor sob ve ayoon ariaŋa. Eemoghon ighaze tamtoghon eta itap ve igham sosor, iit leed ŋgeu deŋia eez to ivolvool toit, ve igham avood ve isasavia saveeŋ toit ila to Tamaan Maaron, nene Yesu Krisi. ^a

2 Ye imaat inim watooŋrau, leso ireu sosor toit ve itatan mbalmbali to Maaron. Uraat toni tonowen, ye igham pa iit moghon maau. Igham pa tamtoghon tisob to taan. ^b

Tamtoghon to ighaze iwatag Maaron, nene pale itaghon tutuuŋ toni

3 Ighaze mataad kisin Maaron tutuuŋ toni ve tataghon di, nene irau taghilaal taghaze iit tawatag Maaron. ^c

4 Ighaze tamtoghon eta isaav ighaze ye iwatag Maaron, eemoghon itaghon tutuuŋ toni maau, nene ye ŋgeu to kaarom, ve saveeŋ onoon ineep ila lolo maau. 5 Eemoghon ighaze tamtoghon eta mata kisin Maaron aliŋa ve itaghoni, nene ipatooŋa ighaze ŋgar to lolood pa Maaron ineep ariaŋa ila lolo wa. Tovenen ighaze taghamgham tovene, nene irau tawatag taghaze iit taneep tuŋia ila to Maaron. ^d

6 Tovenen ighaze tamtoghon eta isaav ighaze: “You nanim Maaron le ve naneep tuŋia ila toni,” nene ye irau itaghon ŋgar to Krisi irau sawa isob. ^e

Ighaze taneep ila ghazooŋa to Maaron, nene pale lolood pa tamtoghon ve tagham poian di

7 Yam nditag to lolog payam kat, tutuuŋ to nambooda payam ne, paghu payam maau. Nene tutuuŋ muŋgina. Akaria loŋaaŋi wa. Sawa to yam aghur ila muuŋ, ve inim aazne, tutuuŋ tonene ineep tiam. ^f

8 Eemoghon tutuuŋ to nambooda payam ne, aazne inim paghu muul. Pasa muuŋ, anoŋa ivot kat maau. Ve aazne, Krisi igham anoŋa ivot. Ve yam paam apatooŋ anoŋa ivot wa. Pasa, ghazooŋa tau to Maaron isul ariaŋa. Tauto ŋgar to ndoroom ighaze isob tonene. ^g

9 Ighaze tamtoghon eta isaav ighaze: “You naneep ila ghazooŋa to Maaron,” eemoghon ighur koi pa toŋvetaz toni to Krisi, nene ye inepneep ila ndoroom lolo sone. ^h

10 Ve ighaze tamtoghon eta lolo pa yes toŋvetaz to Krisi ve ighamgham poian di, nene ye inepneep ila ghazooŋa to Maaron. Tamtoghon tovene irau igham ŋgar eta to igham tau, ma ndita pida titap ve tipul ghurla todi ne maau. ⁱ

11 Eemoghon ighaze tamtoghon eta ighur koi pa toŋvetaz toni to Krisi, nene ye inepneep ila ndoroom lolo. Ye le ghilalooŋ maau. Pasa, ŋgar to ndoroom ipoon mata wa. Tauto laghooŋ toni, ye itaghon ŋgar to ndoroom, ve ighilaal ataam to itaghoni ne maau. ^j

Saveeŋ iŋarua yes ndolman ve ndipain papaghu

12 Ndinatug, ^{▼▼(2:12) Ndiran ŋgara pida tighaze saveeŋ ‘ndinatug’ tonene iza to yes Kristen tisob. Ve saveeŋ ‘ndolman,’ nene iza to yes Kristen muŋginadi. Ve saveeŋ ‘yam ndipain,’ nene iza to yes Kristen papaghu.}

you nambood saveeŋ tonene ilat tiam pasa, ila Yesu Krisi iza, Tamaan Maaron ireu sosor tiam isob ilale wa. ^l

13 Ve yam ndolman, nambood saveeŋ tonene ila tiam pasa, Ŋgeu to ineep muuŋ ve inim, ^{▼▼(2:13) Ndiran ŋgara katindi tighaze Ŋgeu to ineep muuŋ ve inim, nene Krisi. Ughita 1 Yoan 1:1.}

yam awatag katini wa. Ve yam ndipain, nambood saveeŋ tonene ilat tiam pasa, yamŋa Ŋgeu Samia aparab ve alib pani wa.

14 Tovenen ndinatug, you nambood saveeŋ tonene ilat tiam pasa, yam awatag Tamaan Maaron wa. Ve yam ndolman, nambood saveeŋ tonene ilat tiam pasa, Ŋgeu to ineep muuŋ ve inim, yam awatagi wa. Ve yam ndipain, nambood saveeŋ tonene ilat tiam pasa, yam ayoon ariaŋa, ve saveeŋ to Maaron ineep tuŋia ila lolomim irau sawa isob, ve yamŋa Ŋgeu Samia aparab ve alib pani wa. ⁿ

Lolood pa mbeb to taan toman ŋgar to taan malep

15 Yam aghur lolomim pa ŋgar toman mbeb to taan malep. Pasa, tamtoghon to ighaze ighur lolo pa ŋgar toman mbeb to taan, nene irau lolo pa Tamaan Maaron maau. ^o

16 Ŋgar to taan, iit tawatagi wa: Lolood igham pa mbeb to uliid, mbeb naol naol to taan tigham mataad, ve tapakur tauud pa mbeb toit. Ŋgar tovene inim pa Tamaan Maaron maau. Nene ŋgar to taan. 17 Taan toman ŋgar ve mbeb naol to taan to tamtoghon lolodi igham padi, nene pale tilaledi. Eemoghon tamtoghon to ighaze itaghon Maaron lolo, nene pale ineep le alok. ^p

Yes to tizorzoor Yesu aliŋa tighaze ye Mesia maau, nene tinim Krisi koia

18 Ndinatug, apatum gham! Pasa, sawa to Maaron ipasob uraat toni, tauto aazne taza pani wa. Muuŋ, tisaav payam tighaze: “Muri, Yesu koia ^{▼▼(2:18) Yesu koia tonene, yes Grika tiwaata ila taudi aliŋadi tighaze “Antikrais.” (Antikrais pughu tovene: Krisi koia, ma tamtoghon to ipakur tau ighaze igham Krisi ina.)}

eez pale ivot.” Ve aazne, katindi tivot wa. Tovenen iit tawatag: Sawa to Maaron ipasob mbeb tisob, tauto taza pani wa. ^r

19 Muuŋ, ndiran tonowen tiluplup toman ghiit. Eemoghon aazne, tipul lupuuŋ toit wa. Tovenen yes avaat tamtoghon toit kat maau. Inimale yes tamtoghon toit kat, tone irau tipul ghiit maau, ve tinepneep toman ghiit sone. Ŋgar to tighami, nene ipatooŋ di ighaze muuŋ, yes tamtoghon toit kat maau. ^s

20 Eemoghon yam animale ndiran tonowen maau. Pasa, Maaron patabuaŋ igham tau Avuvu payam wa. Ve yam asob awatag saveeŋ onoon. 21 You naghaze yam akankaan pa saveeŋ onoon, to nambood rau tonene ilat ne maau. Saveeŋ onoon, yam awatagi wa. Ve yam awatag: Saveeŋ onoon irau inim pughu pa kaarom eta maau. Pughu tonene to nambood rau tonene ilat tiam.

22 Sei to ŋgeu to kaarom? Nene ŋgeu to izorzoor saveeŋ ighaze: “Yesu, ye Mesia maau.” Tamtoghon tovene, ye inim Krisi koia. Ye ipul muri pa Krisi ve Tamaan Maaron paam. ^t

23 Pasa, tamtoghon tisob to tipul muridi pa Maaron Natu, nene Tamaan Maaron ineep toman di maau. Eemoghon ighaze tamtoghon eta ivotia ghurla toni ighazooŋ ighaze ye ighur ila to Maaron Natu, nene Tamaan Maaron paam ineep tomani, ve yesuru tilup di tinim ee moghon. ^u

Iit irau takis saveeŋ onoon tuŋia ila lolood, ve tataghon pooz to Avuvu Patabuaŋ

24 Tovenen saveeŋ onoon to tisavia payam muuŋ ve inim, matamim iŋgalŋgali ve akisi tuŋia ila lolomim irau sawa isob. Leso aneep tuŋia ila to Tamaan Maaron ve Natu Yesu Krisi. ^v

25 Nepooŋ tovene itaghon saveeŋ mbuaaŋ to Yesu igham pait. Pasa muuŋ, ye isaav ighaze iit pale tagham nepooŋ poia ila to Maaron itaghoni taghoni gha ila. ^w

26 Saveeŋ tonene, you nambooda ilat tiam, leso matamim imosmoos pa ndiran kaaromŋa to tighaze tipaghau gham pa ataam to Maaron. 27 Eemoghon yam, Krisi igham tau Avuvu payam, ve Avuvu tonenen ineep toman gham irau sawa isob. Tovenen yes to tizoorndug tighaze tipatoot gham pa Maaron aliŋa, ledi uraat eta payam maau. Pasa, Maaron Avuvu tau ipatoot gham pa mbeb to naol ne. Ve ŋgar to ye ipatoot gham pani, nene kaarom maau. Nene onoon moghon. Tovenen yam irau ataghon ŋgar tonenen, leso aneep tuŋia ila to Krisi irau sawa isob. ^x

Taneep tuŋia ila to Krisi, ve tasaŋan mulaaŋ toni

28 Ndinatug, aneep tuŋia ila to Krisi irau sawa isob. Leso sawa to ye imuul inim ve ipatooŋ tau ivot ighazooŋ, iit tamatughez pa tala tagharaui sob, ve mayaad ila mata malep. ^y

29 Yam awatag: Krisi, ye ŋgeu to ŋgar deŋia. Tovenen yam irau awatag aghaze: Tamtoghon tisob to titaghon ŋgar deŋia, nene Maaron igham di tinim paghu, ve tinim ye ndinatu wa. ^z